WAT N ELLENDE
Wat ist n doffe ellende ien dörp. Even heb ik nog docht om Steven, jem wieten wel t mantje van Moarum, te vroagen met mij deur t dörp te goan om alles es met mij te bekieken. Mor doar heb ik van of zien. Hij ston doar zo droevig te kieken. Met al die ellende dus dat heb ik niet doan. As ik zo bij mij deur t veurste roam kiek, ist van of veurige week hielemoal niks. Grode bulten modder. Grode bulten zand. Grode bulten stienen. De hiele dag is er zo n grode kroan aan t lewaai moaken. Zo hen en weer aan t rieden. Grode gatten ien e grond. En moandag laag de stroat er veur n gedeelte uut. Mos de auto op n anner plak parkeerd worden anners kon ik niet meer vot kommen. En t bennen allemoal jonge jonges die aan t wark bennen. Er is loof ik één ollere man bij. Die zal t spul wel ien e goaten hollen moeten. Mor ja ik ken ze moeilijk schatten. Hoe old ze bennen en ik vroag er niet noa. Het toch gien zin. Mor t is n grode puinhoop. En verder ien t dörp? t Mantje het uutzicht doar woar de bibliotheek stoan het. En de Molenstroat doar ist ok nog niks. As je argens hèn moeten moe je hiel goed uutkieken want dan is de weg weer ofsloten deur zo n kroan van meters hoog. Of er stijt een allernoaste grode vrachtwoagen veur je neus. En goa zo mor deur. Ik ken mij veurstellen dat Steven het niet meer veurmekoar hollen ken. Heb jem hem wel es goed bekeken dizze doagen? Er lopen geregeld dikke troanen over zien wankjes. Ze bennen nog net niet bevroren. En de school, De Bron, is ok hielemoal verdwenen. En noast Birit Bloemsierkunst, stijt ok zo n hoge kroan. Doar worden appartementen bouwd heb ik mij vertellen loaten.
Loat ik het es van e annere kant bekieken. Jem wieten allemoal wel dat het spreekwoord zegt: het moet eerst minner worden veur dat t beter wordt. Nou doar goa ik dan mor van uut. Die allernoaste grode bulten modder en zaand, woar hoalen ze dat toch vot. Dat komt doar dus allemoal uut de grond denk ik. Veurige week kwam er nog n hiele grode vrachtwoagen en die löste doar ok nog een hiele bult zaand. De stroat hoalen ze er uut, goan het aanwalsen of hoe het mor hieten mag, en dan kommen de stienen er weer ien. Mor ik moet zeggen, zo handig as ze dat doen. Ongelooflijk zo rap. Dus het bennen nog niet zukke minne jonges. Zo of en toe hemmen ze er pepieren bij. Dan stoan er van die standertjes met lichtjes te flikkeren. n Poar doagen, messchien wel een week heur ik doar een pomp of zukswat lewaai mokken en dan komt doar wodder uut een slang. De hiele dag en de hiele nacht. As ik dan sums wakker wor heur ik dat vremde geluud as ik op berre leg. En dan wiet je wel hoe dat gijt, Moet ik mor aal luusteren. Wat n vremd gebroddel. Dan vroag ik mij òf, woar komt aal dat wodder vandoan? Zoegen ze dat uut de grond of zo. Zal ik doar es noar vernemen? As ik niks vroag, wor ik ok niks gewoar. Wat mij wel opvalt, er kommen nou gien minsen meer met honden laangs om ze te loaten….. poepen ien t gras. Gien één meer. Wat mij ok opvalt, er lopen geregeld minsen laangs, die ik anners nooit zie. Nijsgierigen. Nou kennen jem denken dat ik de hiele dag veur t roam stoa te kieken. Is niet zo. Mor as ik noar buten kiek… krekt dan zie ik dat. En tegenswoordig moet ik veul lopend doen. Want met de fiets ist zelfs levensgevoarlijk. Ik ken sums amper argens tussendeur. En bovendien, de krant krieg ik nou harstikke loat. We hemmen een andere bezörger kregen. Die anner was er hiel vroeg bij. Messchien wel om n uur of zes. En dizze? Sums zo tegen negen uur. Dan tref ik hem welles. En met slecht weer ist sums nog loater. Ik let er niet zo op. Mor as ik ien de brievenbus kiek en er zit nog gien kraant ien. Het belangriekste? Ik krieg de krant wel. En ien e krant lees ik allèn mor ellende. Zo ben ik weer bij t begun.
Wie schetst mien verboazing: vrijdag was de weg weer vrij. De stroat was ientrild en aanveegd. Ik kon er weer langs. Heb mien auto ien de garage zet. Nou moet er nòg een stroat kommen en er moeten nog huzen bouwd worden. Ik zal t zien. Ik hol jem op e hoogte. Ofsproken!
MARTJE