Column Martje: Old Nijs
Het zal jem vast niet ontgoan weden dat de Paus overleden is. Het zat er aan te kommen en zekerswoar het gebeurde op tweede poasdag. As ik het zo noa goa, het nog nooit eerder een paus dat presteerd. Nou zalt mij benijden wel de nije paus wordt. Of nij. Hij is minstens over de zeuventig heb ik begrepen. Dus eiglieks aal met pensioen. Mor nee de paus moet deurgoan tot zien dood en dat ken dan vast niet meer joaren duren. Zol het dizze keer een nederlandse paus worden? Het is aal 400 joar leden dat Adrianus paus west is. Toch wadden ze niet zo bliede met hem, want hij wol alles hiel eenvoudig. Dat was men niet went toen destieds. Kardinaal Wim Eijk uut Utrecht wil wel paus worden. Nou ja woaorm niet. Ik ben veur, aal ben ik niet katholiek.
Veur dizze column har ik aal hiel wat anners bedocht. Zoas jem zo langzoamerhand wel wieten ben ik aal joaren abonnee op t Nijsblad van t Noorden. Elke dag as ik doar ien lees, wor ik pessimistischer. Eiglieks stijt er allèn mor ellende ien. Negatieve dingen zalk mor zeggen. Dan is er weer één dèlstoken, of vermoord. Of verongelukt. Veurige week is er nog een hert tegen n auto aanlopen. Bij moarum op de A-7. Wel dat overkommen is? Stijt er niet bij. Mor t is niet niks. En overliedensadvertenties. Nooit meer een geboortebericht. Ik ken mij doar wel n beetje bij veurstellen. Want n kiend kriegen is niet goedkoop. En de advertentiekosten die bennen ok niet omme nucht.. Dus woarom zal je doar je geld aan uutgeven? Ze hemmen tegenswoordig een babyshower. Aal hoeven doar de toekomstige ollers, of eiglieks de aanstoande moeke, niks aan bijdroagen. Woarom moet dat? Woarom eerst niet rustig ofwachten tot t kiend geboren is? Ik wil niet pessimistisch weden, mor er ken van alles misgoan op t leste ogenblik. Ik zal gien één bang mokken. Mor zo ist toch? Verder allèn mor oorlogen aanrandingen, doodmokken, wurgen, ontvoeringen en goa zo mor deur. En aal die wolven die schoapen dood bieten. Hier bij Moarum lopen ze ok aal rond. Toch stijt ien e krant ok nog wel goed nijs as je t mor zien willen. Zoas: twee halen één betalen. Of 1 + 1 gratis. En veul, hiel veul aanbiedingen. Sums wel met 50% korting. As je doar oog veur hemmen, ken je geld verdienen. Zo liekt het. Mor loat je niks wies mokken. Reiskes veur n spotprieske. Vergis je niet, as je op reis bennen, moet je toch nog van alles bij betoalen. Het liekt allemoal mooier dan t ien werkelijkheid is. Dus kiek uut en pas op.
Gelukkig hemmen we nog ‘De Krant” en t Westerkwartier en de Moarumer. Wat n geluk. Want doar stonnen meestal allèn mor bliede berichten ien. Er was één die was honnerd joar worden. Noatuurlijk was Ard van der Tuuk erbij. Met een groot bos blommen. Dat was niet niks. Hij hoeft het zulf niet bijhollen, heb ik mij vertellen loaten. Doar zit één veur op t gemeentehuus. Die zal wel ien t gemeentehuus zitten, mor zo wordt dat zegt. Nou die het het er vast hiel drok met. Want börgmeester is er zulf lang niet altied bij. Dan moet een wetholler of locobörgmeester of zukswat het opknappen. Dat is veur de betreffende personen vanzulf een hiele teleurstelling. Of niet dan? Zestig joar trouwt. Of 65 zestig joar. Een hiel enkele keer 70. Dan komt vervast de börgmeester zulf. Nou dan ist t bruidspoar aal mooi op leeftied. Ien die tied, hiel vroeger dus, trouwden ze nog splinterjong, bliekt wel, anners kennen ze die 70 joar niet hoelen. Dan mozzen ze ok nog toestemming hemmen van de keuningin om te trouwen. Tegenswoordig trouwen ze pas as ze tegen de vittig of vieftig bennen. Of hielemoal niet. De kiener de deur uut of zeker aal van de basisschool of, en nou moet het mor es weden. Ik zeg er niks van. Dat moet elk zulf wieten. Is makklijker dan scheiden. Dat is gien kleinigheid. Dus trouw dan mor niet. Het gebeurt ok wel es, dan goan ze noa joaren toch trouwen en dan? Krekt dan ist noa n joar over en goan ze toch nog uutmekoar. Ra, ra, hoe ken dat? Ze hemmen toch aal joaren soamenwoond? Nog meer goed nijs ien de ploatselijke kranten? O ja zeker wel. Overaal werden er feestprogrammas bekend mokt. Bij ons op De Wending zallen de kiener wel weer op heur kleedjes kloarzitten, om van alles te verkopen. Je kennen t zo gek niet bedenken. En er is altied wat lekkers te koop, zoas loempias of anners wat.
Mor gelukkig: wij hemmen de vlag uuthongen zotterdag. Het was feest: KONINGSDAG.
MARTJE
