Opa en oma worden, wat een feest vinden wij dat! Twee kleinzeunties kregen we een half jaor nao mekaor. Twee prachtige kadogies bint dat! We past nou geregeld op, dan op de één, dan op de aander, en enkel een keer tegeliek op beiden. En dan steit der sums wat leuks op ’t program, zoas een mörgen naor Ballorig. Daor schreef ik het volgende over:
* * * * * * * * * * * * * * *
Twee dundersteenties
Oma past een daggie op,
Twee tweejaorige mannegies
Bint toevertrouwd an heur zörgen
Ze hef ze eerder al beloofd
Dat ze saomen gaot speulen
’t Wordt vast een mooie mörgen
Allebei een rugtas op de rug
Met een schone luier, een flessie
En wat fruit in een bakkie van Tupperware
Op plek van bestemming ankommen zeg oma nog even
“Nou straks wel mooi gaon speulen heur”
Oma holdt niet van geblèer
Binnen hebt ze allebei al gauw
De tas van de rug en de schoenen oet
De één steit al op ’t luchtkussen te hippen
De aander kek eerst nog wat rond
Maor dan wet e wat e wil
Hij geit met een klein wichie op de wipkippen
Ze speult, klimt, wipt, gliert en rent
Kommen aof en to een slokkie drinken
Of eten een paor stukkies manderijn
Maor laang duurt een pauze niet
Want ze vind dat speulen
Hier met mekaor veul te fijn
Dus rent ze beiden weer vort
Ze bint zo drok as wat en
Oma hef ’t zweet veur de kop
Ze kek van de één naor de aander
Je moet ze wel in de gaoten hollen toch
Doet ze wel veurzichtig, past ze wel op?
Maor as ze de tassies weer inpakt hef
En de schoenties bij mekaor zet
Alles gereed steit veur vertrek
Is ze beide jonkies oet ’t oog verloren
Oh, oh, waor kunt ze nou toch wezen
Gelukkig is ’t een overzichtelijke plek
Maor waor oma ok kek
Naargens de twee dundersteenties
Oma schöt al gauw licht in de stress
Nao twee rondties om de glierbaon
De wipkippen en het luchtkussen
Was ’t zeuken nog gien succes
Zie holdt niet van geblèer
Maor heur eigen traonen zit al aordig hoog
Tot ze een bekend stemmegie heurt
“Omaaa, omaaa” klinkt het heul haard deur ‘t gebouw
Waor komt dat vandaon?
Is der wat met ze gebeurd?
Maor as ze kek in de ballenbak, schöt ze in de lach
Ze zöt tussen de doezenden gekleurde ballen
Allèn van beide jonkies een lachende rooie toet
Ze hebt saomen lol veur tien
En ze maokt oma schaoternd dudelijk
“Oma, oma, kiek ies hoe wij stopperie doet!”
Henderkien
