Wees ies leif
Het zöt der momenteel niet zo rooskleurig oet in de wereld. De dreiging vanoet het oosten, de oorlog in Oekraïne en Gaza, de onzekere toustand in Iran en Jemen en gao zo maor deur. En onze wereldleiders Trump en Poetin geven ons al huilemaol gien hoop, al wil Trump wel huil graog de geschiedenisbouken ingaon as vredesstichter.
En in ons eigen laand is het ok niet veul soeps. Het kabinet is al weer demissionair en alles wordt aal maor duurder. Rechts en links kommen aal meer tegenover mekaor te staon waorbai geweld soms ok niet schuwd wordt.
Wai as inwoners van Noordenveld kunnen an dizze problematiek niet zoveul doun maor in onze eigen omgeving kunnen wie wel een lichtend veurbeeld wezen.
Wees ies leif
een leive lach
een beettie ontzag
een mooie kaort
een vrundelijk woord
het döt ons zo goud
verzaomel wat moud
en deil een pluumpie oet
of gewoon een groet
even een doem omhoog
een klaaine knipoog
een aarm om je tou
hou is het nou met jou
een simpel gebaor
het is toch zo waor
’t bennen de klaaine dingen
die je dag doun zingen
tea nijnuis