Zo kent wel weer
Wadden jem nog bang veur Rusland? Is hielemoal niet neudig. Jean Paul Rawie, die man schrift elke week een column ien t nijsblad van t Noorden, van hem heb ik vernommen, en dat is echt woar, dat Rusland nog nooit een oorlog wonnen het. Ze peberen het wel, nou weer met Oekraiëne, mor het lukt ze niet. Het kost allèn mor miljoenen doden. Dat klinkt messchien hiel veul, mor dat is het niet. Ien e eerste wereldoorlog wast aal n ramp, toen bennen er nog meer omkommen dan ien de tweede wereldoorlog. Ze wollen het winnen van Hitler, mor dat is niet lukt. Rusland het zoveul pebeert om annere landen ien te nemen, mor ze hemmen het nooit kloar kregen. En nou zalt ok niet lukken. Ze vieren wel het ènde van de tweede wereldoorlog, mor wonnen hemmen ze t niet. Wat ze met Poetin aanmoeten? Gien idee. Mor nou las ik veurige week ien e krant dat Poetin Oekraiëne gijt verliezen, want de okranieners hemmen aal weer delen van Rusland veroverd. Dus wat schieten je er met op? En de ienwoners van de hoofdstad van Rusland begunnen zuch ok aal van alles of te vroagen. Welk land het ooit een oorlog wonnen? Er is één positief bericht. Mark Rutte bemoeid zuch er met!
Nou stijt t voetballen weer bovenaan. Wat een drokte. Wel wil ik altied wieten wel t wonnen hemmen. Mor dat is ok alles. Zukke gekken die ien t stadion omhoog kommen as ze t wonnen hemmen of verloren. Nee niks veur mij. De wedstried tegen Algerije hemmen ze verloren. Gien wonner ik zag Ronald Koeman met de handen ien e buus stoan. Nou dan wordt het toch niks! Geef mij de T.T. van Assen mor.. Ik herinner mij nog dat Mike Hailwood met dee, doar was ik fan van en Agostini. Dat geluud van die motoren allèn aal. En dan deur de bochten, lagen ze zowat op e weg. Machtig mooi. Door ken ik van genieten. Nooit gien trammelant. Altied feest. As ik t goed onthollen heb, reden ze toen nog met ziespan. Volgens mij nou niet meer. Wel nou de besten bennen? Zeg het mor.
Veurige week heurde ik veur omroep noord over de Grunninger zaikte. Ik docht, wacht es, doar heb ik es een verhoal over schreven. Even opzuken. Willen jem wel leuven dat ik het nargens vienen kon? En het was zo n mooi verhoal. Het gebeurde ien 1826. Lang leden dus. Volgens mij stroomde t wodder van de lauwerszee nog tot stad toe. Wadden er nog gien goeie dieken die t wodder tegen hiellen. Zodoende brak die besmettelijke ziekte uut. Ik ken hem host nog uut de kop. Ik zal het wel op een hiel makklijk plakje ien n map doan hemmen, mor ien welke? Ik heb aal wel 200 verhoalen schreven. Veurien die mappen zit een ienholdsopgoave. Ken ik ze altied weer vienen. Volgens mien eerste gegevens die ik veurbie kwam, zat dit verhoal op nummer 37. Mor willen jem wel leuven dat het er niet bij was. Doar was een hiel anner verhoal. Dus nog mor even verder zuken. En even hiel goed noadenken. Woar ken er weden?? Trouwens om die 37 ston een rondje, dat was wel een beetje apart. En verdolt ik kreeg een idee. Dat verhoal har ik veurlezen bij één of annere vereniging. Zoas jem vast wel wieten schrief ik elke vittien doagen een stukje ien t Acht Dorpen nieuws. Dus docht ik messchien ist één van die stukjes. Doar heb ik er ienmiddels aal meer as viefhonnerd van. Dan mor even goed noadenken. Ien welke map dan? Ien de eerste? Of de tweede? Messchien ien de dade map? En zeker woar op nummer 37 doar was ”Grunniger zaikte”. Gevonden!. Ik bliede. Hoe wast möglijk. Zo zie je mor weer, as je wat kwiet bennen, het komt altied wel weer teveurschien. Goed noadenken wil wel es helpen. En anners mor niet! Kiek en as je argens noar aan t zuken bennen kom je allerhande annere dingen tegen, woarvan je t bestoan niet eens meer wizzen. Zo von ik een kelender bladje van mei 2001. Nou willen jem vanzulf groag wieten wat doar wel op ston! Doar komt het: Seks is mooi as je jong bennen, as je oller worden, heb je startkoabels neudig. Toen docht ik, dan ken de Wegenwacht het nog wel es smoordrok kriegen. Want er bennen vast wel mannen, teminste ik denk dat het doar veur bestemd is, die startkoabels neudig hemmen. Of heb ik het mis? Mor ja, ik ben n vrouw dus hoe moet ik dat wieten!
Nou lezers dit wast veur dizze keer. Starkte met t warme weer. En op tied de wegenwacht bellen!
MARTJE