IPP: Een gaatje in een beschuit... briljant
Joaren leden docht een ver familielid van mij dat ze n heule uutviending doan had.
Ze had heur idee opstuurd noar Bolletje, jim wieten wel, van de beschuten.
Vervolgens het ze der niks weer van heurd. Ze ha-der ok niet aan docht om der patent op aan te vroagen. Ien diezulfde tied, ongeveer 1999, wa-der ok een meneer Tempel die et zulfde idee had mor der wel patent op aanvroeg. t Ging om een lutje inkeping ien e beschuut, zodat je de beschuut makkeleker en hiel uut e rol kriegen konden. n Heul simpele uutviending, mor wel briljant, doar is beschuut-etend Nederland t wel met eens.
Tempel had zien uutviending aanboden aan Bolletje, mor die hadden gien belangstelling.
n Joar loater kwam Bolletje zulf ok met zo’n beschuut op e markt. Jim kinnen begriepen dat je toen de poppen aan t dansen hadden. Der kwammen alpmoal rechtzoaken achterweg, niet allinneg met Bolletje mor ok met Haust, die vonden dat de uutviending niet patent weerdig was. Mor beide beschuutbakkers hemmen verloren en elke keer dat ze n rol beschuut met inkeping op e markt brengen, kinnen ze een bedrag aan Tempel betoalen. Bolletje beweerde dat ze al eerder dan Tempel dit idee hadden. Dat verre familielid van mij wiet wel zeker dat Bolletje heur idee stolen het en dat ze meschien wel n miljoen mislopen het.
As uutviending van de eeuw wordt nog altied de boekdrukkunst noemd, dat was al ien 1450. Hoewel de Chinezen al 400 joar eerder die uuviending doan hadden, mor ja die tekens konden wij niet lezen. Dat was natuurlek ok heul wat dat er geschriften en boeken zo verspreid worden konden. Dizze Duutse uutviending het wel de wereld veranderd.
De allereerste uutviending was de uutviending van t vuur deur de oermens. Ok et moaken van gereedschappen van steen, zoas de ‘vuistbijl’. Ien t Noordelijk Archeologisch Depot ien Nuus bewoaren ze allerlei veurwarpen uut die vroege tied die ien onze omgeving vonden binnen.
Vremde uutviendings binnen der ok west, bijveurbeeld ien 1913 toen een Hongaar uutvond dat je bellen konden ien e auto. Der wadden twee antennes veur neudig, één veur en één achter op e auto, verbonden met elektrische koabels.
Vrouwen binnen ok echte uutvienders. WiFi en Bluetooth en wegwerpluiers binnen deur vrouwen uutvonden. Nederlandse uutviendings binnen der ok en zeker niet de minste. Microscoop en telescoop en niet te vergeten de onderzeeboot en de brandslang ontsprongen uut n Nederlands brein.
Aan t enne van e veurege eeuw werd er n wedstried uutschreven, men kon een verhoal iensturen over wat de uutviending van die eeuw was. Een ander ver familielid van mij het hiermet ‘Het Nijsblad’ hoald. Heur ienzending was de winnende ienzending.
Hieronder een gedeelte van t stukje wat ze ienstuurd het:
t WC papier, wat n uutviending! Zeker as je t vergelieken met vroeger, as je toen noar t huuske mosten dan had je te doen met heul ander pepier. Vroeger brukende we olle kranten, netjes ien reepkes sneden. Die stukjes papier werden aan n roestige spieker prikt of ien een doarveur bestemd bakje stopt.
En nou jammern de kiender al dat mien gewone wc papier net schuurpapier is.
Tegenwoordeg moet et zacht en ok nog vochteg wezen.
Deur alle uutviendings, van drukpers tot wc papier, wordt et leven hiel wat makkeleker.
Leneke Struiksma
Mientje: ‘Die het et buskruut ok niet uutvonden!’
