IPP: Burger

Ien Brussel binnen een aantal zwoar betoalde en zeer belangrieke minsen met totoal verkeerde dingen bezeg. Begriep me goed, ik bin veur Europa, ik denk dat hiel veul dingen beter gezoamelek aanpakt worden kinnen dan dat wij dat met ons kleine kikkerlandje allinneg doen. Mor toch, wat er nou aan e hand is.....?

t Ston met koeienletters ien e krant, een ‘veggieburger’ mag niet meer zo hieten. Dat schept verwarring met de ‘echte’ burger. Ik heb nooit begrepen woarom zo’n schijf een burger hiet, volgens mij geft dat sowieso al hiel veul verwarring. t Idee dat broave burgers vermoalen worden en dan as ronde schieven ‘recycled’ terugkommen ien n broodje met currysaus en siepels is zowiezo al roar. De moderne mins as kanniboal.  En t geldt ok veur al die aandere zoaken, veggie worst, veggie ham.  

Wat nou zo biezunder is, t gijt niet om t woord ‘veggie’, dat is dik ien orde. Nee, t gijt om de rest, burger, worst, ham en zo. Al die producten die niet van dooie dieren moakt worden, mor die der wel wat op lieken, die moeten een aandere noam hemmen. Tenminste, dat viendt dat volk ien Brussel. En t zel wel woar wezen, want et stond, zoas ik al zee, ien e krant. Der moet mij nog wat van t hart. Thuus eet ik nooit vlees of vleesproducten. Butenshuus doe ik dat wel, want ik bin gien principiële vegetariër. Dat ik thuus gien vlees eet, het  te moaken met mien privé en ik heb er gien enkele moeite met. Ik kin jim verzekern, ik mis der niks aan, ik kook zulf ok voak en we eten met smoak. We kommen niks te kört. 

Mor as ik doar wel es over proat met verstokte vleeseters, dan doen ze nogal denigrerend. ‘Hoe kin je die rommel nou eten, dat is toch niet te vreten’ en dat soort proat. Hoe voak ik niet heur: ‘Ik moet mien stukje vlees hemmen’, nou, van mij mag et. Ik stel doar tegenover: ‘Ik eet ok alle doagen lekker”. Mag dat? We goan niet discussiëren, ik wil elk ien zien weerde loaten. Van mij mag alles. Mor woar t ien dit stukje over gijt is de benoeming. Vroeger, veurdat we ien e huidege beschoaving zatten kreeg één die beveurbeeld n been misten most, n holten poot. Voak hiel knap moakt deur de timmerman uut et dörp. Tegenwoordeg, nou we beschoafd worden binnen krigt zo iemand n kunstbeen. Ik vroag mij òf, of ze doar ien Brussel ok over noadocht hemmen. Want dat kin natuurlek niet. Zo’n ding kin natuurlek gien been hieten want dan roaken onze hazzens ien e toes. Je zollen et een ‘veggiebeen’ numen kinnen, mor dan is t probleem nog niet oplöst.  

We kinnen nog wel even zo deurgoan. Veur één met n kunstgebit heb ik wel n oplössing: Kauwgereedschap. Veur kunstgras: Plastic begroeiing. En veur dat kunstvlees ben ik benijd wat of jim der veur bedenken kinnen. Ik zol zeggen, stuur de oplössings noar komopverhoal@gmail.com . Loat ze zich doar ien Brussel met nuttege zoaken bezeg holden, wij wassen dit ‘varkentje’ zelf wel even. Want dit soort onzin zel mij verder n worst wezen.

Piet de Vries

Mientje: “Of je veggieworst lust.”