Moi Noordenveld - Sunterklaos
Een klein wichie, vief jaor aold, zit in de tweede klas van de kleuterschool. Vandaog is Sunterklaos op school en dat is spannend veur alle kinderies. Ze bint al een poosie an ‘t knutseln wèest veur dizze dag. Sunterklaos moet toch weten hoe ze allemaol heet, dus hebt ze een hoodtie maokt, waor juf de naom op schreven hef. De meesten bint wat onder de indruk, het is rustig in de klas. Ze zit met mekaor om Sunterklaos hèen en achteran zit de moders. Zwaarte Piet huppelt wat deur de klas. De kinder zingt saomen leedties en omstebeurt moet ze bij Sunterklaos kommen. Dan is het wichie an de beurt.
Ze is een beetie bang en lop langzaom naor hum to. Hij kek wat streng en begunt een gesprekkie met heur. Hij vrag heur of ze dizze week ok wat kwietraokt is. Dat is zo, maor hoe wet e dat? Ze is een paor daogen terug heur neie springtouw vergeten. Ze hef het op school in de gang an de kapstok laoten hangen en as ze het de volgende dag met wil nemen, is ‘t vort. Ze is der slim verdreetig van. Waor kan dat touw nou wezen? Heur pap en mam bint kwaod. Deurdat ze een klein dreumerie is, is ze vaok wat kwiet. En nou vrag Sunterklaos der ok nog naor. Ze kreg een kleur en kek naor heur schonen. Ze duurt Sunterklaos niet ankieken, maor moet toch antwoord geven. Heul zachies zeg ze: ‘Ja.’ Hij vrag wat ze dan kwiet is. ‘Touwtjespringtouw’, zeg ‘t wichie. Hij vrag an Zwaarte Piet of die ies even in de zak wil kieken. Dat döt Piet en hij haolt d’r een springtouw oet. Het is het touw van het wichie. Ze is stomverbaosd en dèenkt: Hoe kan dat nou? Hoe komp dat touw in de zak van Piet? Sunterklaos kek heur nog ies streng an en zeg, dat ze in ‘t vervolg beter op heur spul moet passen. Veurdat ze heur touw van Piet terug kreg, legt Sunterklaos heur over zien knee en kreg ze een tik met de roe van Piet. Dan kan ze met heur touw stief tegen zich andrukt weer naor heur stoeltie terug.
Sunterklaos is verder leef veur alle aandere kinder. Zij is de enige die wat met de roe kreeg. ‘s Aovends in heur berre moet het wichie der om schreien. Ze perbeert altied leef te wezen, good te luustern naor heur pap en mam en naor de juf. Ze begrep der niks van en wet niet precies wat ze der met an moet.
Nao verloop van tied dèenkt ze aal minder an het veurval, tot het weer november wordt en Sunterklaos weer naor Nederland komp. Dan komp alles in alle hevigheid weerom. Die ene tik met de roe hef der veur zörgd dat ze nou bang is veur Sunterklaos en Zwarte Piet. En het duurt jaoren eer ze daor overhèen is. Zölfs as ze niet meer geleuft, vindt ze het nog een spannende tied.
Wanneer het wichie volwassen worden is en zölf kinder hef, geit ze met ze naor school as het 5 december is. Ze wil niet hebben, dat heur kinder bang maokt worden en holdt de aole man en Piet good in de gaoten.
Gien enkel kind verdeent de roe, niet omdat ze niet good op heur spullegies past en ok niet om aander dingen. Tenslotte is Sunterklaos een kindervrund en dat mussen wij maor zo laoten!
Henderkien
