De nieuwe column van Martje Grondsma: goeie veurnemens
Drie feest doagen achtermekoar. Hadden jem nog wel even deur goan wilt of hemmen jem de piep uut.
Drie zallen jem denken? Ja want de zundag is toch ok n feestdag. Zo moeten jem dat wel bezien. Bennen jem de karstdoagen goed deurkommen? Hemmen jem aan t gourmetten west beveurbeeld, of vot west te eten. Dat ken morzo. Of hemmen jem gezellig thuus met eventuele kiener of annere femilieleden om e toafel en onner de karstboom zitten te eten en drinken. Ien mien gedachten zie ik mannen veul eten mor vrouwen dan? Die bennen anners? En hoe voelt op woensdag? En dan komt nijjoar nog.
Het is mor één keer ien t joar te vieren. Jem goan niet midden ien e summer karst vieren. Dat voelt niet goed. Al wordt dat ien Australië wel doan. Allèn doar kennen ze er niks aan doen, dat de karstdoagen ien e summer valt, al ist wel december. En gijt de karstboom, zo jem die ien huus hemmen, drekt de deur uut of blift die tot noa nijjoar stoan? De lichtjes ien annere karststukjes goan die uut of blieven die nog even aan. Mor het klinkt messchien roar, mor dan is de sfeer vot. Veuraal veur degene die weer fris en fruitig aan t wark moeten. Nog n beetje lam ien e benen?
Ik heb es even noakeken hoe het zit met de viering van Kerst; as we de geboorte van Jezus herdenken. Nou doar is elk en één het lang niet over eens. De vierde eeuw noa Christus is kerst as christelijke feestdag ienvoerd. Franciscus van Assisi har bij zukzulf bedocht dat er een levende kerststal mos kommen. Dat was ien 1223. Lang leden. Dat mos dan de aanbidding van de herdertjes veurstellen. Hoe kom je erop. Mor jem kennen het zulf wel es noakieken op “google” doar ken je alles vienen. Of alles…
Bennen we net weer n beetje op dreef, komt nijjaor der aan. Weer eten en drinken. Euliebollen, appelflappen met poeiersukker. Toch wel weer lekker. Veural as ze niet al te vet bennen. Want dan ben je er gauw zat van. Eiglieks is één, hooguut twee genog. Mor doar goan we niet vanuut. En veul geknal. Al mag dat niet meer zo ast vroeger ging. Dat was nog es nijjoar vieren. Nou moet alles stil weden. Ik begriep dat wel mor toch. Sierveurwark mag nog wel. Het zal mij nij doen hoe t dit joar gijt.
Even wat anners. Hoe ist oflopen joar belukt? Hadden jem goeie veurnemens en bennen die allemoal goed uutkommen? Hemmen jem doar goed jem best veur doan? Of het t er wel aan. En nou dan. Hemmen jem veur 2024 weer goeie veurnemens? Dat ken van alles weden. Een joar, as je der veur stoan liekt laang. Mor wees es eerlijk nou ist aflopen joar aal weer verleden tied. Achterof bekeken wast ien n zucht en scheet veurbij. Even over jem goeie veurnemems. Ophollen te roken, of deurgoan. Ophollen met drinken of deurgoan. Dizze keer die ruzie es bijleggen of niet. De nije fiets es schoonmokken. De zoller oprumen. Want wat doar allemoal verzoameld is. Het legt er hielemoal vol. Noar de kringloop of eerst anneren vroagen of die er belang bij hemmen. De kiener beveurbeeld. Meestal hemmen die het hielemoal niet neudig zeggen. En pas loater denken ze, woar is dat toch bleven? Bij de weg zetten? Groatus metnemmen. Het ken allemoal. Zo ken ik nog wel n hiele boel annere dingen opnumen.
Het volgende probleem kwam ik tegen: ofkortingen. De krant stijt vol met b.v. het C.B.R. = centraal bureau rijvaardigheid. Dat is duudlijk. Mor dan C.P.B. veur mien idee betekent dat: Christelijke Plattelands Bond. Mor tegenswoordig ist Centraal Plan Bureau. Doar wor je toch van ien e war. Of je lezen er gewoon over hèn zo van het zal wel. Je maggen host wel n universitère opleiding had hem om al die ofkortingen te kennen begriepen. Wat betekent I.M.G. ? Dat wieten jem vast wel n.l. (namelijk) Instituut Mijnbouwschade Groningen. C.B.S. Centraal bureau voor statistieken. Woar dat veur is, is mij hielemoal onduudlijk. Wat hemmen we der aan. Z.Z.P. dat begript elk wel: zelfstandige zonder personeel. Dat is zo kloar as n klontje. Nog één dan. O.M. Openbaar ministerie. D.G.B. ik har er nog nooit van heurt, het betekent: de groene belangen behartigen. Hoe komt men erbij. N.C.G. Nationale Coördinator Groningen. E.C.B. Europese Centrale Bank. Hiel belangriek. Nou hol ik er met op.
Lees de krant er mor es op noa. Allemoal ofkortingen en bennen het dat niet, dan bennen het engelse uutdrukkingen. Je kennen het wel vergelieken met n puzzel. Nog één dan M.E.M. (Mien eigen mening)
MARTJE
