Column Martje: tussen sunnerkloas en karstdogen
Nog even over sunnerkloas en zien zwarte knecht(en). Vroeger har er mor één knechtje. Dat was een sloaf wer er beweerd. En een sloaf kreeg niks betoald. Eten en drinken en sums nije kleer en dat wast wel. En as er bij sunnerkloas ien dienst was, wast volgens mij een ereboantje. Loater kwammen er aal meer pieten bij, zwarte pieten. Dat wadden vrijwilligers, widde minsen die zwart mokt wadden. Al n poar joar wordt doar tegen demonstreerd. Zoas dat zo mooi hiet. Woarom is mij ontgoan. Nou vroag ik mij of, al die minsen die dat doen, kriegen die niks van sunnerkloas? Of zoas dat zo mooi hiet: doen die nog aan sunnerkloas? Loat men doar es onnerzoek noar doen. En dan dat gedoe op Ameland. Het was de omroep PowNed verboden te kommen. Har de börgmeester duudlijk zijt. Heb ik heurt. Mor toch kommen vanzulfs. En nou goan ze aangifte doen. Woarom eiglieks? Ze hemmen het toch zulf uutlokt? De Amelanders hemmen groot geliek. Gien pottekiekers erbij. Dat is privé. Of niet dan.
Dan moet ik het nog even met jem hemmen over de nije formoatie van de regering. As ik Plasterk zie, moet ik altied denken aan n komiek. Zo’n gezicht het die man. En dan moet er serieuse gesprekken voeren met Geert Wilders, Pieter Omtzigt, Caroline van der Plas enz. enz.
Al die belangrieke mannen of vrouwen worden bij de veurnoam noemt. Behalve Plasterk. Eerliek zijt wiet ik niet eens hoe er van veurnoan hiet. Mor as ik zien gezicht allèn aal zie. O ja, ik wiet het weer, hij hiet Ronald. Hij zal wel goed weden veur zien opdracht, mor hoe kieken die anneren er tegen aan? Zoas Frans Timmersmans en een hieleboel anneren. En dan bennen er veul meer minsen die met de veurnoam noemt worden, neem nou Gert Jan Segers, die is uut de tweede koamer, dat wiet ik ok wel mor Mona Keijzer is overstapt. En dan hemmen we nog Gijs Tuinman, Vera Bergkamp. En ok gewone minsen zoas Ron Bransteder, Martijn Krabbé Simone Kleinsma, Imca Marina, Maya Wildevuur, Theo Hiddema, Albert Verlinde en zo ken ik t hiele blad wel volmokken. Dat doe ik dus niet. Bovendien wor ik zulf ok voak bij de veurnoam noemt. En moe je es begriepen, as we trouwden hiel vroeger! Wadden we er tröts op dat we Mevrouw noemt werden. En nou vienen we t hiel gewoon dat elk je bij de veurnoam noemt. Veur mij ist wel es lastig want mien schoonzuster hiet netzo. Mor doar is niks meer aan te doen.
Nou heb ik op de televizie het programma: Ongehoord Nieuws ontdekt. Ken jem dat. Goa er mor es noar kieken is op NPO 1. Doar wordt ons verteld woar we allemoal bang veur mnokt worden. Hoe we veurlicht worden deur de veurlichters en de media. Dat was veur de corona, wat we doar allemoal veur loaten mozzen. Nou dat loog er niet om. Mor het was niet zo as ons wiesmokt wer. Op t ogenbik leggen er weer hiel wat minsen met corona ien t ziekenhuus. Wordt ons wiemokt. Mor hemmen die minsen wel of niet de corona prik had? Doar heur je ze niet over. Vertel mij dat mor es.
Nou denk ik dat het met dat verbieden van roken netzo is. As je dat allemoal loven moeten ist nert of de meeste minsen longkanker kriegen van roken. Is niet woar. En as het verboden wordt wil juust elk en één goan roken. Is veul spannender.
Zodderdagmörgen zat ik zo es over mien stukje noa te denken, toen docht ik ieneens, wacht es, doar ien Ter Apel ist een grode bende. Is doar niks aan te doen? Kennen ze doar nou niet praktisch denken? Aal die asielzoekers, vluchtelingen en wat niet aal zitten doar bij mekoar. Te lanterfanten. Zollen er doar nou niet wat tussen zitten die wat doen willen? Die as vrijwilliger de boel wat schoon hollen en op orde brengen. Ze leggen doar zuch röt te vervelen. Ze kriegen alles eten, drinken onnerdak veur zover meugluk. Mor alles moet veur ze doan worden. Het loopt ons letterlijk over de schoenen. Ik adviezeer: goa es bij die minsen laangs zo van: wie wil wat doen, krieg je eventueel wat ekstroas mor loat de boel niet verslonzen. Eiglieks is dat aal gebeurt. Komt er nou niet één op t idee om die minsen aan t wark te zetten, zodat ze gien gekke dingen uuthoalen? Of mag dat messchien niet? Ik vien t hiel vremd dat doar nog nooit aan docht is. Liekt mij n stuk gezonder. Hoe denken jem doar over?
MARTJE
