Onneroardse gangen
Tegenswoordig vient men overaal onneroardse gangen. Dan hier dan doar. Spannend om zukswat te ontdekken. Mor doar wil men dan meer van wieten en goan dat onnerzoeken. Het is vanzulf wel hiel spannend. Sums komt men niet zo hiel ver, want dan bennen ze ienstort of dichtgooit. Zoas ien Limburg woar al die mijngangen bennen. Doar werden ze bruukt veur stienkool. Dat is aal lang verleden tied. Hoeveul bennen doar wel bij om haals kommen. En zoas ik het wiet verdienden ze niet eens zoveul. Heur leven was er met gemoeid. En heur gezondheid. Want denk er mor om hoeveel stof men ienoademde. Dat was toen nog niet aan de orde. Anneren gingen tunnels groaven om uut de gevangenis te ontsnappen. Meestal lukte dat niet.
Kortleden las ik weer t een en anner over onneroardse gangen, toen mos ik drekt denken aan die ien Auwerd (Aduard) Destieds ging ik noar de legere school en wer doar riolering aanlegd. En ontdekte men doar onneroardse gangen. Dan is t gauw rond verteld, doar is een gollen stoel ien verbörgen. As kiener zijnde was dat slim spannend. Zolt t woar weden? En woarom har men die gangen aanlegd? Toen mos ik ien eens denken aan het boek: één klooster drie Dorpen. Nou as ik dat boek deurlezen zol duurde dat zeker wel n half joar en wis ik het messchien nog niet. Dan heb ik nog een boek: De abtenkroniek. Gijt over de abten ien t klooster van Auwerd. Zol het doar messchien ien stoan? Nou ik leufde het niet zo slim. En ik har ok nog een boek van Wolf Meesters: Grethe uit de Blauwe Engel. Het boek is schreven veur de tweede wereldoorlog. Wacht es doar kon het wel es ien beschreven weden. Want dat ging ok over t klooster ien Auwerd en Abt Landt die toen doar heer en meester was. Het boek opzöcht het speulde ien de joaren 1566 enz. en Grethe ging op peerd, die har toen nog kop en poten, noar t klooster. Bovendien wadden er ien die tied de gevechten tussen de katholieken en de minsen die het eens wadden met Luther, Zwingli en Calvijn. En dan niet te vergeten de Mepsche. Jem hemmen doar vast wel es van heurd. Ien die tied werden er hiel wat minsen vermoord. Ze werden ophongen en dan bungelden ze doagen aan de galg of aan n hoge boom. Of ze werden verbrand. Nou lekker. Men doet dat nou hiel anners, mor dat is n anner verhoal.
Het was vanzulf hiel spannend om die gangen te onnerzuken. Volgens mien geheugen liepen die van t klooster tot ien Grunnen. Woarom? Gien idee of toch wel, om te vluchten denk ik. Hoe het ien mien tied oflopen is wiet ik niet krekt, mor ik heb er n boekje over schreven.
Een 50 joar leden ik denk ien 1971, was ons buurjonkje ziek. Haar leukemie en was ien t ziekenhuus beland. Tussen hoakjes hij is beder worden en leeft nog vrolijk verder. Mor toen heb ik, zo of en toe as zien ollers noar hem toegingen, een hoofdstuk schreven over die onneroardse gangen ien Auwerd. Een poar joar leden las ik ien e kraant dat er ien Peize een man was die boeken uutgaf. Ter verpoozing. Doar heb ik kontakt met opnommen en zo het mien boekje het licht zien. t Was gien kleinigheid om dat goed vermekoar te kriegen. Alles mos goed noakeken worden zodat er gien fouten ien veur kwammen. Trouwens ik ken jem geruststellen het is ien t ABN schreven. Dus niet stoer, zoas ik sums heur, as ze mien stukjes ien t Westerketiers lezen moeten. Het is n spannend boekje worden, woarien drie jongens en twee wichter op zoek goan noar de golden stoel van Auwerd.
Het Auwerder klooster was wereldberoemd. Dat mag nog wel even zegt worden, mor hielemoal verwoest. Woar wadden ze toen met aan e gang!. Er wadden trouwens ien dizze omgeving nog veul meer kloosters te vienen. O.a. het witte nonnenklooster en as de monniken op reis gingen kwammen ze altied overnachten ien t nonnenklooster. Dat gaf te denken. En hoe zat het met t Bareveld dan? Doar is ok wel n verhoal over te vertellen. Mor messchien loader. Of heb ik dat al es doan? Nog even over mien boekje dat hiet: “Opzoek naar de gouden stoel van Aduard”. Of ze de stoel vonnen hemmen? En wat ze allemoal beleven doar onner de grond? Trouwens die gangen wadden wel 1.68 hoog. As jem er nijsgierig noar bennen, kennen jem t altied bij mij weghoalen. Dan maggen jem t ruilen veur € 5 . Dan kriegen jem t boekje. Spannend!
MARTJE