Maria uut Magdala
Poasen hemmen we al weer had. Toch wil ik het nog even met jem over Maria uut Magdala hemmen. As jem wel es ien e Biebel lezen, bennen jem heur noam vast wel es tegen kommen, zo omstreeks Poasen. Ien 2015 was er een biebelvertoalslag. Degene die toen n verhoal over Maria Magdalena ien stuurd het, ken ik wel. Hij komt uut Zuudloaren en schreef ien t Grunnings. Dus niet ien t westerketiers. Hij is noar Amsterdam ofreisd en is aan e proat roakt met Maria uut Magdala. As ik t goed begrepen heb, wast n schillerij van Rembrandt van Rijn. Die leefde van 1609 -1669. Dan wor ik nijsgierig. Ik heb een boek doar stonnen alle biebelse personen ien. Ik docht doar moet ik mor es ienkieken. En ja hor, doar ston Maria uut Magdala ien, met petret. Allèn was dat petret veulle mooier dan wat Rembrandt schillerd har. Doar kikt ze een beetje gemeen uutziet. Dizze is schillerd deur, Piero di Cosimo. Die leefde van 1462 – 1521. Ok dizze persoon kon niet wieten hoe Maria er uut zien het. Woar dit schillerij hangt? Gien idee. Mor ik roek aan e proat met dizze mooie vrouw. Dat verboasd jem? Nou pebeer het mor es. Het ken morzo.
Eerst heb ik heur vroagt hoe ze met Jezus ien aanroaking kommen was.
“Nou”, zee ze,” As kiener speulden wij altied bij t meer van Galilea. Doar kwam Jezus hiel voak met n hiele koppel volk. Doar het er ze allemoal eten geven. Moest dij es veurstellen, honnerden. Toen wer ik ziek. Hiel slim ziek. Verschrikkelijk. Geestelijk en lichoamelijk. Dat schient vandoag de dag ok nog veul veur te kommen. Op n dag, zat ik veur t roam te kieken, kwam Jezus veurbij. O ja dat moet ik nog wel even zeggen, ik har stemmen ien mien hoofd. Ik ken beter zeggen kop, mor dat heurt zo roar. Die stemmen zeden: pas op. Die man doar magst niet met ien aanroaking kommen, want dan gijt het hielemoal verkeerd. Mor ik kon mien ogen niet van Hem ofhollen. En die stemmen riepen aal harder.: Pas op. Niet luusteren. Jezus bleef stoan en keek noar mij. Die stemmen bleven mor schreeuwen. Ik wer er hielemoal gek van. Toen stak Jezus zien hand noar mij uut en zee: “Kom mor noa mij toe. Dan bist genezen.” En dat heb ik doan. En met wadden die stemmen verdwenen en mien lichoamelijke klachten ok. En Jezus zee: volg mij. Dat was nog het allervremdste. As vrouw zijnde achter een man aan lopen. Zeker ien mien tied.”
“Wast een beetje verliefd?” vroeg ik.
“Noust het vroagst., t kon best zo weden. Ien mien tied wer doar eiglieks niet over proat. Mor doe wiest vast wel hoe t of lopen is. Geregeld was ik met annere vrouwen bij Jezus. Met Maria en Marta, de zusters van Lazarus, die uut de dood opwekt is. En met Maria de moeke van Jacobus. En met de moeke van Jezus vanzulf. Het is net of ze allemoal Maria hietten destieds. Dat was bliekboar een algemene noam.
En toen wer Jezus veroordeeld. Mos er aan t kruus. Verschrikkelijk. Wij wadden er bij. Ok vrienden van hem. Wat hemmen wij schreid. Op t lest bennen we vot goan. Hij is deur Jozef van Arimatea en Nikodemus, van t kruus hoalt veur dat t duuster wer, hem balsemd, zo as de gewoonte was destieds, en ien de grafspelonk van Jozef lijd. Toen we wissen woar er was, bennen we doar annerdoags hèn goan. Tot onze schrik zaggen we dat de steen der veurweg schoven was. Hoe kon dat? We zaggen vast spoeken. Ik mos drekt weer aan die stemmen denken ien mien hoofd. Doar heb je t aal docht ik ze bennen trug. Mor t volgende moment was t weer over. Ik ben noar binnen goan en doar lag niks allèn wat windsels. En toen ik beter keek zat er n engel, tenminste zo zag ik dat, want ik har nog nooit eerder n engel zien, die zee: “Zoek mor niet langer. Jezus is opstoan. Goa mor gauw noar Jeruzalem en vertel het zien vrienden.” Onnerweegs kwam ik ok nog één tegen. Ik zee: wieten joe woar Jeuzs nou begroaven is? Ik docht dat t de tuunman was. Mor hij zee: Maria. Toen wis ik dat het Jezus was. Ik wol hem vastpakken, mor dat mogt niet. Ok hij zee: vertel het mien vrienden. Toen ben ik harstikke snel noar Jeruzalem lopen. Nou en de rest wiet elk en één wel.”
Ze zweeg. Ik was verbiesterd. Wat n verhoal. Ik keek nog es noar heur prachtig petret. t Was net of ze noar mij knipoogde.
MARTJE
