ik Proat Plat: ‘De mooiste herinneringen worden op et strand moakt’
De zee het n grode aantrekkingskracht op veul minsen, woarom zollen der aans zoveul, ien zummer en winter recreëren? Huuskes en hotels aan zee binnen altied duurder dan ien andere delen van t laand en dat het alles te moaken met die aantrekkingskracht. As de belangstelling groot is goan de priezen omhoog, dat is n simpele economische wet. Mor woarom is die zee nou zo aantrekkelek?
Aan e Noordzeekust is t goed toeven. Onze oosterburen kommen der groag en wel zo groag, dat je je sums ien t butenlaand woanen. Overal om je hin auto’s met Duutse kentekens. Ien e dörpkes en op terrassen is Duuts regelmoateg de voertoal. Personeel past zich makkelk aan, want de Duutse bezoeker het genog te besteden en de toko moet draaien. Duutsland zelf het mor weineg kust en dan is de Nederlandse kust vanzelf aantrekkelek. En mor groaven, geultjes moaken en zien hoe t wotter stroomt, dat hemmen we allemoal wel doan? En beestjes en schelpen zoeken? Vroeger deden we dat zelf, later met onze kiender en kleinkiender. Dat verandert nooit, dat het n eeuwigheidswaarde. Op et strand blieven de minsen ok altied bij mekoar plakken, veural bij de overgangen. Op n zummerse dag moe- je zoeken noar n plakje. En wil je n strandstoel of parasol huren, dan moe-je der op tied bij weden. Mor nem je de moeite om wat noar links of rechts uut te waaiern, wordt et ieneenent een stuk rusteger. t Vaalt veur veul minsen ok niet met om hiele stukken deur t mulle zaand te zeulen met n koeltas, parasol, et wiendscherm, de handdoeken en e strandstoeltjes. Met kleding vaalt et wat met, doar bin je niet veul van neudeg op n zunnege dag. En op e allerstilste stukken huf je gien kleer aan. Et kin allemoal en minsen binnen der gelukkeg. En wil je niet roodverbraand noar huus, dan is iensmeren een noodzoak. Niet elkeneen holdt der van om op t strand te zitten of te leggen. Ik bin zulf ok zo één, ik word doar onrusteg van, et liefst doe ik wat. Lekker op blode voeten krekt deur t wotter lopen, dat kin ik kilometerslang volholden. Kop ien e wiend, kinst me niet gelukkeger moaken. Andern holden wel van zwemmen en duken, hoe hoger de golven, hoe mooier. Summegen goan elke dag, deur weer en wiend, et is goed veur liggoam en geest, zo wordt er zeid. Weer andern recreëren op t wotter met n bootje, een wotterfiets of n zeilplank. En parasailen is ok heul populair, spectaculair en om te zien hoe summegen meters de lucht iengoan veur ze weer delvalen op e golven.
Elk joargetiede het zien charmes op et strand. Tuurlek is et ien e zummer et drokst, mor et heule joar deur vien je minsen op et strand. Ok as er snij leit of as de wiend je met wiendkracht 9 om e oren snidt. Dat het wat, ien zukse omstandegheden proberen om de natuurleke elementen te trotseren. Een drankje ien n strandtent dut et ok altied goed. Lekker rusteg genieten van e zee, et uutzicht en t helmgras dat waait ien e wiend. Aan t strand is gien dag et zulfde. Mor wat moakt de zee nou zo aantrekkelek was mien vroag. Et is wel dudelek denk ik. De aantrekkingskracht van e zee is n combinoatie van fysieke, mentale en emotionele factoren. Fysiek wordt et wotter trokken deur de zwoartekracht van e moan en de zun, dat resulteert ien eb en vloed. Mentaal en emotioneel waarkt de zee rustgevend deur et ritme van e golven, de zilte geur en de weidse horizon. Zit je der mentaal een keer deur hin, goa dan n dagje noar zee.
Eelke Solle
Mientje: ‘De mooiste herinneringen worden op et strand moakt’
