De Dijken
Zo langzoamaan bin-we aan t idee wend, dat we t wotter beter omarmen kinnen dan der tegen vechten. We kriegen voaker te moaken met dikke regenbuien en we willen et veur weden, dat de zoak hier ien t Westerkwartier met regelmoat ongecontroleerd onder wotter komt te stoan. Ien dat geval hemmen we der veul waark van om de boel weer op orde te kriegen. De wotterschappen hemmen bedocht dat we drie dingen beter regeln moeten. Ten eerste moe-we t wotter langer vastholden, zodat kenoalen en gemoalen niet overbelast roaken. Doarnoast moe-we wotter baargen, zodat we, as t ons uutkomt, bruken kinnen of lozen. t Verbetern van t lozen is de daarde poot aan et beleid. Betere òfvoer deur brede kenoalen en robuuste gemoalen binnen een belangrieke schoakel ien dat geheel.
Dit betekent niet dat we nooit gien last meer hemmen zallen van t wotter. Twee joar leden brak met Pinkster de lucht open boven Butenpost en stonden ze doar tot ver over de enkels ien t wotter. As ploatselek veul wotter noar beneden komt, dan wordt et n toer om dat vlot weg te kriegen, gelukkeg binnen dat incidenten. Bij normale regenval moet et baargen soelaas bieden. Veur et tiedelek baargen van wotter worden zogenoamde ‘waterbergingsgebieden’ ienricht. Dat binnen gebieden die normoal gesproken dreug stoan mor ien geval van nood onder wotter zet worden kinnen.
Ten noorden van Boerakker is ien 2012 wotterbaarging ‘De Dijken-Bakkerom’ deur de Pervincie Grunnen en et wotterschap Noorderzijlvest aanleid. t Is n gebied van totaal 200 bunder en kin maximoal aan 1,1 miljoen liter wotter ruumte bieden. Et gebied is rondom de Dijkweg, die parallel aan e Matsloot lopt. Et moakt deel uut van ‘Natuurnetwerk Nederland’ en is ienricht as natuurgebied. Et laand had last van verdreuging, wat lasteg was veur et al bestoande natuurgebied. Doarom is et wotterpeil ien t omliggende gebied wat omhoog brocht, woardeur et laand weer natter wordt en de fauna weer meer kans krigt.
De noam Bakkerom (Foto: Beeldbank Groningen, v.d. Veen, Matsloot) het n mooie verkloaring. De bakkers van Tolbert en Niekerk hadden beide klandizie ien dizze streek, mor kwammen dan uiteindelek ien n hiel nat gebied terecht. De bakkers keerden dan heur ventkar en reden weerom noar huus. De Bakkerom!
Ien t gebied De Dijken binnen ok twee biezundere noamen, de Bevervallei en de Ottervallei. Van oldsher zillen beide beestjes zich best thuus vuuld hemmen ien et natte gebied, mor ze verdwenen ien e loop van e joaren. Meer wotter ien t gebied dut de meuglekheden veur dizze wotterdieren toenimmen.
De iengrepen ien t gebied wadden niet misselek. Aan e noordkant is n deel van et maaiveld verleegd en kreeg de Inversierug weer wat meer accent. De Inversierug is niet een diekje, mor ontstoan deurdat et gebied rondom ienklonken is. Et was ien t stroomgebied van de OldDijp (het Oude Diepje) dat ien e Middeleeuwen dichtslibte en vervangen werd deur et Wolddiep. Der is n ondiepe slenk groaven, die vissen verleiden moet om doar te paaien en veur et noageslacht te zörgen. De nije slenk met brug en n gemoal loaten et wotter ien et gebied. Der is zelfs een aparte vislift zodat de vissen ongestoord van t ene noar et andere gebied zwemmen kinnen.
Wat kinstoe der as lezer met? Der binnen twee wandelroutes moakt, die de wandeloar langs de uutkiektoren brengen. Langs de routes stoan QR-codes, die verwiezen noar verhoalen over de geschiedenis van et gebied. Langs de Dijkweg is n boomgaard moakt en stoan picknickbankjes, zodat je rusteg eefkes genieten kinnen van e natuur. Wel uutkieken of et de doagen veur de tocht niet hiel bot regend het en et bergingsgebied ien gebruuk is. Ien feberwoarie 2022 is et gebied veur et eerst ienzet. En dan et goeie nijs. Et waarkte alpmoal. Et is n schitterend gebied worden, woar de natuur volop ien ontwikkeling is. Spring mor op e fiets en overtuug dijzelf.
Geert Zijlstra
Mientje: “Et wotter stijt hum al boven de navvel!”
