IPP: Plonsen
Et was ien e begunjoaren 80 van e veurege eeuw toen mien vrienden en ik op vekaansie wadden ien Oostenriek. Wij hadden nog nooit eeuwege snij en hoge bergen zien, dat leek ons wel wat. Dus boekende wij n vekaansie ien Zell am See, midden ien e zummer. t Was der mooi, hiel biezunder om op e eeuwege snij rond te wandeln ien e körte boksem en ok wadden we op e Gross Glockner, de hoogste berg van Oostenriek. De gletsjer smolt en dat is ok wel logisch ien e zummer, al dat ieswotter ging noar beneden ien t meer. t Leek ons wel wat om doar ien te zwemmen, mor lang duurde dat niet, want och, wat was dat wotter kold! En doar hemmen ze sauna’s veur uutvonden en die hemmen ze genog ien Oostenriek. Dus een handdoekje onder de arm, slippers met en wij noar de sauna, woar we veur die tied nog nooit west wadden. We mosten noakend, mor dat leek ons gien probleem. En wij as jonge gezonde en toen nog vrijgezelle jongens, hopende doar ok nog mooie wichter tegen te kommen. De sauna was fantastisch, et spel van hiet en kold, beviel ons wel. Allinneg die jonge wichter, die hemmen we niet zien. Wel vrouwlu, die ons oma weden konden, die vonden die jonge jongens meschien wel mooi, aansom was dat niet zo. Mor et zoadje veur de sauna was bij mij wel plant.
De tweede keer dat ik noar de sauna ging was ien Limburg, mooi ver vot. Ik had toen n vriendin en die vertelde ik over et oaventuur ien Oostenriek en hoe mooi een sauna weden kon, ik had heur aanstoken met mien enthousiasme, ze wol wel met. Et risico om ien Limburg een bekende tegen et blote lief te lopen was niet zo groot, dat durende we wel aan. En et beviel mien vriendin ok wel, heerlek om zo van hiet noar kold te goan, een weldoad veur liggoam en geest. Toen mien vriendin mien vrouw worden was, besloten we voaker de sauna te bezoeken en ien die tied, was Gorrediek onze uutvalsboases. n Prachtege sauna ien n olle boerderij, lekker de hiete cabine ien en doarnoa gingen we ien n tobbe zitten met stienkold wotter. We vonden et prachteg en toen der n sauna ien Zeuvenhuzen opend wer, binnen we doar hinne goan. Vanòf et begun dat Zeuvenhuzen open is, kommen we der al. Et moakte ons nou niks meer uut of we n bekende tegen kommen zollen, je binnen ien je blootje, mor die aander ok. En goed bekeken, zien we der noakend allemoal et zulfde uut, we binnen allemoal geliek. Schoamen is niet neudeg, et is n beschoafde wereld.
Alle moanden gingen we noar de sauna en meestieds ien Zeuvenhuzen. Toch groeide bij ons de wens nog voaker te goan, mor et is ok wel n dure hobby. Zo kwammen we n keer terecht ien n saunawinkel, woar ze sauna’s op moat bouwen veur thuus. We roakten aan e proat met de verkoopster en zij prees de boel zo aan, dat wij besloten dat er mor es één bij ons thuus kommen most om te kieken of et bij ons ok mogelk was. Zo is t gebeurd, de kiender binnen et huus uut en der is ruumte genog, de saunabouwer zag gien enkel probleem. En toen de pries ons ok nog es aanston, hemmen we de knoop deurhakt. Sinds n aantal weken kinnen we nou ien onze eigen sauna, even een half uurke opstoken en we kinnen lös. Et is mor klein, mor genog veur ons beiden. Et spel van hiet en kold boeit nog altied, et is gezond. We moaken der alle weken een keer gebruuk van. En die tobbe? Die hemmen we ok, even lekker plonsen!
Eelke Solle
Mientje: “Elke week op vrijdaogoavend achter mekoar ien e tobbe!“
