Arme dochter van Aduard
Ieneens zat ik met de handen ien t hoar. Wat was er aan de hand. Har ik net n interessant onnerwarp bedocht, om n stukje over te schrieven, las ik veurige week dunnerdag een artikel ien t dagblad van t noorden over: “Arme dochter van Aduard” dan wor ik nijsgierig. Woar gijt dit over. Dat zal ik jem vertellen. Want zoas jem messchien aal lang wieten kom ik oorspronkelijk uut Auwerd.
Günter Brandorff, ik ken die hiele man niet, het een boek schreven over de verborgen geschiedenis van klooster Trimunt. Dan wiet ik drekt, dit gijt ok over t klooster van Auwerd. En Trimunt was doar een onnerdeel van. Doar heb ik een hiel dik boek van: “Één klooster drie dorpen”. Bovendien heb ik: “De abtenkroniek van Aduard” ok. Nou kennen jem denken, hest die beide boeken lezen dan? Want het bennen hiele dikke boeken. Nee dus. As ik wat wieten wil kiek ik er wel ien en lees hier en doar een stukje. Zo dee ik nou ok vanzulf. Jem wieten vast wel dat er een klooster stoan het op Trimunt. Een nonnenklooster wel te verstoan. Die Brandorff dus zol zien boek vrijdagmiddag presenteren, bij de Melktap ien Trimunt. Verder ston er niet bij hoe loat. Dus ik bellen. Dat zol s middags weden om half drie. Mag ik dan ok kommen. Dat mocht en ik moch wel één metnemmen. Er zollen een vittig man kommen. Doar wer op rekend. Mor wij konnen er wel bij. Jammer genog is er niks van kommen. Vrijdagmörgen wer ik beld: het gijt niet deur. Günter Brandorff het longontsteking. Zodoende ken ik niet vertellen, hoe t goan is.
Bij de Romaanse kerk ien Moarum-west is een deur achter de kerk, die is volgens mij altied open, doar ken je hèn goan en doar krieg je de route van het witte nonnenpad. Dat heb ik nog nooit doan, mor ik ben er wel nijsgierig noa. Dizze Günter het er es goed over noadocht en een boek schreven over dat nonnenklooster. Een boek van 312 bladzijden. Volgens hem wadden het hiele arme nonnen. Het zal wel, mor as het een onnerdeel van t Auwerder klooster was, ken ik mij dat host niet veurstellen. Hij het er wel drie joar over doan om er achter te kommen hoe t precies zat. Hoe het geestelijk leven was, het er niet uut aal die geschriften ontdekken kent. Zoas jem messchien wieten was er niet allèn op Trimunt een klooster mor ok aan de Linsterloan en één aan de Kuzumer. Ik heb mij altied vertellen loaten, as de monniken op reis vanuut Auwerd, gingen, gingen ze eerst ien het Kuzumer klooster aan. Uutrusten, dan noar Trimunt, noar t nonnenklooster. O ja dat moet ik ok nog even vertellen ien Auwerd wast een monnikenklooster. Dus die monniken kwammen ien Trimunt overnachten. Ik zeg doar niks van, mor toch. En dan was ien Moarum het Bareveld. Wat was doar met aan de hand. Kennen jem je doar wat bij veurstellen? De nonnen gingen dan een pooske vot. En kwammen dan zomor weer trug. Dat was een groot roadsel. Ik zeg er niks van. Ik ben er niet bij west, dus ik wiet van niks. Mor toch. En dan al die abten doar ien Auwerd, doar gingen wilde geruchten over. Niet van allemoal, mor van abt Landt is wel het één en anner bekend. Volgens de historie was hij een slappeling. Ik zal t nog even noakieken, volgens mij was dat één van de leste abten. Eiglieks zol ik hiel groag wieten willen hoe het ien die tied ien zo n klooster toeging. Er wadden lieden, zo zal ik ze mor numen, die schonken land aan t klooster en dan veroverden ze een plakje ien de hemel. Ken jem je dat veurstellen? Wat hemmen ze de minsen wat wiesmoakt. Ik heb de abtenkroniek er nog even op noa lezen. Ik heb niet kennen vienen wanneer t klooster Trimunt bouwd is. Ien 1560 ongeveer ston er een renovoatie van het zusterkloostertje Trimunt bij Moarum ien de boeken. Zo stont er krekt. Dat ien de vittiende eeuw onner de hoede van Auwerd was kommen te stoan. Eerst wast n benedictijner loater n cisterciënzer vrouwenklooster. Het klooster van Auwerd is sticht ien 1192 en ien totaol bennen er 36 abten west. Ik zit hier echt niet een hoop onzin te schrieven, en jem kennen t noalezen ien de Abtenkroniek van Aduard.
De kans bestijt dat as Günter weer beder is, hij alsnog zien boek presenteert. En dan ben ik er zeker bij en vertel jem hoe t goan is. Ik wens hem vanof dizze ploats van harte beterschap.
MARTJE
