DEMONSTREREN!
Het is de hoogste tied dat wij landelijk en zo mooglijk over de hiele wereld een allerieselijkse grode demonstroatie goan organiseren. Goan jem nou recht op zitten en denken: woar gijt dit over? Gijst nou ok aal met doen? Nou dan zal ik t jem gauw uut de doeken doen en jem bennen het vast wel met mij eens, dat wiet ik zo wel. Wij goan demonstren en loaten wij dat om te begunnen eerst ien eigen dörp, dan ien de pervinzie en dan landelijk en zo verder. Elk en één is aan t demonstreren tegen de oorlog. Doar ben ik ok op tegen, wel niet, mor we zien dat t niet helpt. Allèm mor rellen, ongenoegen en schoa. En summigen wieten nieteens woar ze veur of tegen demonstreren. Wij goan demonstreren veur VREDE.
Nou even over wat anners. Sums zie je dingen doagelijks wat je hielemoal niet opvalt en dan ieneens, dat is vremd. Zo as veurige week toen vroeg ik mij ineens of: wie bedenkt de recloame veur t Kruidvat? Want wat zegt die moe? “jongens we moeten bezuinigen”. Volgens mij zitten doar duudlijk twee wichter op e bank en die kieken verschrikt om. Zij geven hun mam drekt tips hoe ze bezunigen ken. Beveurbeeld. bij de kapper. Nee dat is het niet. Zij goan noar t Kruidvat. Doar is alles harstikke goedkoop. Ben ik het wel met eens, mor woarom zegt ze jongens as het wichter bennen. Mor wel bedenkt zo n recloame? Trouwens, alle doagen komt het veurbij. Vandoag heurde ik “Herman” die kwam op bezoek bij minsen, bij t programma: meester Frank Visser doet uitspraak. Zo jongens nu gaan we naar Mr. Visser, zien wat die er van zegt. Mor doar zatten duudlijk een man en vrouw op e stoel. Let er mor es op hoe voak dat zegt wordt. Trouwens zelf mok ik mij er ok wel es schuldig aan. We doen t niet met opzet, mor dat legt bliekboar makklijker ien e mond. Zeg gewoon, jonges en wichter of mannen en vrouwen. Of is dat teveul? En woarom nemen de vrouwen doar genoegen met. Let er mor es op hoe voak men jonges zegt.
Neem nou al die tolkshows. Zitten er mannen en vrouwen aan e toafel mor er wordt zegt: “Jongens” gieneen die doar aanstoot aan neemt bliekboar. En dan wordt ons aanproat dat we niet meer doames en heren zeggen maggen mor mensen. Nou woar ben je dan met aan e gaan.
Genog hieover. Achter mien huus stijt een hiel mooi vogelhuuske. Jem begriepen dat het veur vogeltjes is. Ien e eerste ploats veur leutje vogeltjes en die kommen dan ok groag ien mien vogelhuuske vreten. Dat bennen musken, koolmezen, of en toe een roodborstje en nog meer onduudlijkheden.
Dan kommen er ok duven. Die joag ik voak vot. Guster docht ik ieneens, woaorm doe ik dat eiglieks.die maggen toch ok wel vreten uut mien vogelhuuske. En dan zie ik oksters. Dat bennen nog es mooie vogels as ik ze goed bekiek..Altied prachtig ien e kleer: zwart wit. En een mooie lange steert. Let er mor es op, onnerling bennen ze altied ongeliek ien e veren. Mor strak ien t pak, zal k mor zeggen. Kieken altied ien t rond. Of er onroad is messchien? En dan die schreeuwoksters, (Vlaamse gaai) niet te vergeten. Die het hiele mooie kleur veren. Een hiele mooie vogel met n hiel slecht karakter. Dat ken er ok niet helpen. Mor guster zag ik een hiele grode kraai, denk ik dat t was, op mien hokje zitten. Ken ok n anner soort weden, mor zo goed ken ik ze niet. Dat is toch een machtig mooie vogel. Tot ien e puntjes zwart. Gien ongeregelde kleur te bekennen. Dat is toch hiel geweldig bedocht. En dan een dag eerder, toen wer ik toch zo glèn ien e hoed. Klom mij doar n kat bij t vogelhuuske omhoog. Op dat moment wadden er allèn mor leutje vogeltjes aan t vreten. Mor deurdat die kat zuch goed vasthollen mos, kon er zo gauw gien poot uursteken om n vogeltje te pakken. Gelukkig. Die zaggen t gevoar op tied, want ze vlogen verschrikt vot. Toen liet de kat zuch weer noar beneden ploffen. Gelukkig ist nog net goed goan. Mor dat moet ik niet weer zien. Katten bennen best mooie dieren, mor ze moeten van mien vogeltjes ofblieven. Een kat dood mokken? Dat mag en ken zomor niet. Dan krieg ik de dierenbescherming op mien dak om mij op mien wandoaden te wiezen. As ik het nou es hiel stiekem doe? Maag dat dan wel?
Dus wij goan demonstreren veur VREDE?
MARTJE
