Martje: HOE ZAL IK ‘t ZEGGEN
Woar ken ik het met jem over hemmen? Wat zat mij hiel hoog? Krekt al die minsen die de A12 blokkeren. Wat n ellende. Die klimoatactivisten noemen ze zuch. Of met n duur woord: “Extinction Rebellion”. Wat het krekt betekent zal mij n worst weden. Het klinkt teminste hiel duur. Hoeven ze niet warken, denk ik dan. Zij schuuven alles of op e regering. Doe er zulf wat aan. Mor goa niet de weg blokkeren, tot argernis van de minsen die wel warken. En dan nemen ze ok nog lutje kiener met. Die moeten zogenoamd ok met alles op e hoogte weden. Dat vien ik misdoadig. Loat die kiener nog een joar of wat kiend weden. Lekker speulen met poppen of autootjes. Buten speulen, mor ze niet opzoadelen met zukke acties. Bovendien begriepen ze er niks van. Hollen ze er een trauma aan over. Geef een goed veurbeeld. Loater zien ze messchien heur pa of moe wegsleept worden deur de plietzie. Goed veurbeeld doet goed volgen? Niet dus. En al die plietzies dan? Denken ze nou echt dat die doar met plezier aan warken om aal die minsen weg te slepen. Een nacht ien e cel en mörgen weer vrij? Nou heurde ik op de televiezie dat het OM toch van plan is ze een proces aan e broek te doen. Vien ik goed. En dan hemmen ze een groot woord, dat het allemoal mag ien ons land. Vrijheid van meningsuiting en vrijheid van demonstreren. Nou loat de regering doar mor wat aan doen. Positief protesteren vien ik goed mor dit? En alle doagen? Ik vient niks. Messchien zie ik het hielemoal verkeerd. Er bennen vast minsen die het met mij eens bennen. Loat ze alle rommel oprumen die noa een nachtje stappen of feestvieren, achterloaten wordt. Doar doen ze toch nog wat goeds met. Ik heurde ok nog dat ze met dattig bussen ofvoerd werden. Hoe bennen ze dan kommen? Lopend, met de fiets of zo? Overaal mag je tegenwoordig tegen protesteren. Ik vient niks. En dan kommen ze veur de rechter en dan hemmen ze zwijgrecht. Nou as men doar zit, wat veur recht heb je dan nog? Hielemoal gien recht liekt mij zo. De avecoaten zeggen dan: hoefst niks zeggen. Zwiegen. Spreek de woarheid, mor dat is dan ver te zuken. De één liegt nog meer dan de anner. Op den duur wiet je zulf niet meer, hoe t krekt zit. En hoe laang duurt het sums wel veur dat er een uutsproak is, hoelang en woarveur men zitten of warken moet. En wat kost dat wat! En wat ston veurige week ien e krant? Hemmen jem t ok lezen? De zwembadmoord hier ien Moarum pleegt op 9 juli 2012, doar zol nou een definitieve uutsproak veur kommen! Nee dus. Er was weer één of anner foutje mokt en dan ging t weer niet deur. Weer ien e stress weer ofwachten. Nou een mooie rechtsproak denk ik dan. Nou wieten ze nog niet hoe de vlag erbij hangt.
Nou hemmen ze t over al dat verkeer op e weg. De meesten goan noar t wark. Dat was joaren leden een stuk makklijker. Destieds mos je niet al te ver van je wark wonen. Mor dat geft nou niks meer zeker. En dan willen de warknemers ok nog benzinegeld van heur werkgevers. Is niet neudig. Dichter bij wonen goan. Desnoods met woningruil. O wil men persee ien e grode stad blieven wonen, nou best, zuuk anner wark. Veul minner uutloatgassen. Veuraal met al die files. Wat n tied verlies.
O ja de boeren doar moet ik het ok nog even over hemmen. As ze t melkquotum er niet of doan hadden, hadden ze nou niet met dit stikstofprobleem zitten. En aal dat stront niet te vergeten. Want toen ieneens kon elke boer zoveul koeien melken as er zelf wol. En de banken stimuleerden de uutbreiding. Toe mor jonges het ken nou weer. Grodere trekkers. Melkrobots mest stallen en goa zo mor deur. En nou zitten we met de gebakken peren en ze wieten niet hoe ze er met aan moeten. Mor onnertussen: de boeren over t algemeen hemmen het goed veurmekoar. Die bennen de regering een stap veur. Die wieten wel hoe t moet. En de boeren uutkopen veur meer dan t bedrief weerd is? Wat is dat veur onzin. Wij hemmen de producten neudig die ze verbouwen en die deur de koeien levert worden. Dan wordt er beweerd: doe met dien boerenverstand. Doar wordt met bedoeld dat ze niet veul boven de ogen hemmen. Nou die hemmen meer dan n hiele boel.
En leer de kiener op school wat nuttigs. Ien e eerste ploats het Wilhelmus. Volgens mij leren ze dat niet meer. Al ist mor t eerste vers. De onnerwiezers kennen t niet eens. Schandoalig! Bovendien leer de Nederlandse toal. Wat heurde ik van Johan Derksen? Die zee: ”geboren heeft” is toch verschrikkelijk en doar wordt er niet op aansproken!
Veul plezier met t lezen van dit stukje.
MARTJE!
