Moi Noordenveld: Mien breur en ik

De geliekenis met mien breur

Mien pap en mam hebt het bej ien soort laoten, want ik heb maor ien breur. Ik weet ok niet of ze nog probeerd hebt um der een wichie bej te kriegen. Daor hebt ze het nooit over had. Over dat soort zaken wuur nooit praot. En je moet niet vergeten dat het toen een hiel aandere tied was. Wej bint beide geboren in de oorlog. Ik heb der hielemaol niks van metkregen en mien breur wet der ok weinig van. Ik moet zeggen dat onze aolders oes goed opvoed hebt. Wej bint niks te kört kommen en zie hebt oes aaltied stimuleerd um oes verder te ontwikkelen, an sport of muziek te doen. En daor hebt wej volop gebruuk van maokt. Beide hebt wej op gymmestiek en voetbal zeten en zoas ik al in een veurig stukkie schreven heb: ok in de muziek hebt wej goed oes best daon.

Hoewel wej wat karakter betreft verschilt, hebt wej bliekbaor toch van beide aolders het ien en aander metkregen. Mien breur hef het karakter van mam en ik van pap. En van kop en oren liekt mien breur op mam en ik ok weer op pap. 

Maor nou wej beide pensioen hebt, bint wej beide in het bezit kommen van een mooi bossie wit, en wat golvend haor. Dat is vanzölf kommen, daor hebt wej niks veur doen huuft. Waarschienlijk hew dat van opa van mammes kaant. Die had ok spierwit haor, tot an zien dood toe.

Toen mien breur aofscheid nam van zien wark kreeg hej een receptie anbeuden. Mien vrouw en ik waren ok oetneudigd en toen wej binnenkwamen was er direct al een collega van mien breur (hij hef aaltied bej de KI ((kunstmatige inseminatie bej koeien)) warkt) die opmarkte: ‘Dat is zeker ien van dezölfde bolle.’ En dat klopte hielemaol.

Toen wej laoter samen veul wandelvekaansies maokten in Oostenriek, leupen wej ies een tocht

deur de bargen. We leupen op met een Engelstaolig gezin en tiedens rustpauzes passeerden wej mekaor um en um en groetten vrundelijk. Naodat dit drei keer gebeurd was, bleven ze bej oes staon en vreugen of ze oes wat muchten vraogen. Nou, dat was gien probleem.

‘Mien vrouw en ik bint het niet met mekaor eins,’ zee de man, ‘en nou wil ik graog weten hoe het zit. Dat jullie breurs bint is wal dudelijk, maar bint jullie ok een ééneiige twieling?’

Nee dus, want mien breur is drei jaor aolder dan ik.

Bert Blaauw