Ik Proat Plat: Zitbad
Zitbad
Hemmen jim die recloame op televizie ok zien over die mooie badkoamers?
t Is alpmoal zo luxe en weeldereg dat je host gien keuze moaken kinnen.
Ik kin me nog herinnern dat wij vroeger thuus eerst heulemoal gien douche hadden, loat stoan n badkoamer.
Moeke had n zinken badkuup en as baby werden we doar al ien badderd.
Toen we wat older wadden zatten mien zuske en ik tegelieks ien dat bad, altied op zotterdag.
Ien e wintertied mog et zinken badje ien e koamer veur de kachel stoan, aans was t veuls te kold..
Ik kwam op dizze herinnering aan n zinken zitbad, deurdat ik een grappeg verhoaltje tegenkwam.
Gert Jan en Annechien wonen alweer joaren ien t Westerkwartier.
Ien n mooi klein plakje, mor wel met n school, kerk en wat huzen en boerderijen, zulfs de bus ridt deur et dörp.
Een tiedje terug wa-der n boeldag en der was van alles en nog wat te koop..
Gert Jan had heul goedkoop een kistje segoaren op e kop tikt.
Op n zeker moment kwammen ze met n zinken zitbad veur de dag, die werden vroeger veul bruukt toen der nog gien badkoamers en douches wadden. De zunege neef van Gert Jan, Hendrik, had ok zo’n ding heul goedkoop op e kop tikt.
Gert Jan docht bij humzulf “Dit is ja net wat veur Annechien en mij” Annechien wol niet zo’n nijerwetse douche ien huus hemmen, bij t aanrecht konden ze heur ok prima wassen.
Mor nou Gert Jan dat zinken zitbad zien had, zol dat toch wel n verbetering wezen.
Noa wat hinneweer bieden, kreeg Gert Jan et zitbad veur drie gulden. Met et ding op e rug ging er noar huus, t was nog n heule huft. Mor Annechien was heulemoal niet bliede en zee “Wat hest dij nou weer aansmeren loaten? Ik goa der niet ien! ”
Gert Jan wa-der wel bliede met en zette et bad ien e schuur. Ien e zummer kon hij der dan mooi even ien zitten veur wat verkoeling.
Nou en et werd n hiete zummer. Op n dinsdag was Annechien met de bus noar heur familie, ze bleef de heule dag vot. Gert Jan had t riek allinneg en bedocht dat-er wel es even ien et bad zitten kon. Dus hij zette emmers met wotter ien e broadende zun, zo kon t wotter mooi op temperatuur kommen.
Smiddags was t zover, t wotter was mooi op temperatuur, docht er en Gert Jan vulde et bad. Mooi ien e schuur, dan kon gieneen hum zien, veural die nijschierege buurvrouw niet. Alle kleren uut, doar ston er, spierlieke noakent. Hij voelde eerst veurzichteg met zien dikke toon hoe t wotter was, oei dat viel nog tegen. Met et vullen van t bad ha-der wat wotter griemt op e vloer en terwiel er doar op één been stond en snel zien ander been terugtrok, glee der uut. Hij viel zo op e rug ien t bad en alles om hum hin was strontnat.
Toen er van e schrik bekommen was, vond Gert Jan et toch wel lekker ien t vrisse wotter.
Noa n tiedje keek er om hum hin woar zien stukje zeep was, t lag n stukje verderop.
Hij wol et stukje zeep pakken, mor toen kwam hij tot de ontdekking dat er muurvast ien dat bad zat.
Hij zat heulemoal klem en hoe der ok aan t vrutten was, hij kwam niet lös. Och heden, en nou dan, Annechien kwam nog lang niet thuus.
De deur van e schuur stond op n kiertje en Gert Jan heurde lawaai bij de buren. De smid woonde noast hum en die starke man kon hum der meschien wel uuttrekken, met et gevoar dat er dit nog joaren aanheuren most. Hij begon te roepen “Buurman komst mij even helpen ien e schuur?”
Tot zien grote schrik kwam niet buurman met e kop om e deur, mor de nijschierege buurvrouw.
Gert Jan roasde dat ze beslist niet dichterbij kommen mog, ze most met de grootst mogelijke hoast heur man hoalen. Et duurde nog wel n uur veurdat de smid kwam, hij was veur n klus vot west. Die nijschierege buurvrouw lag krom van t lachen. Toen de smid eindelek kwam, kwam ok Annechien net weer thuus. Ze lagen lagen allemoal n deuk toen ze zagen dat Gert Jan doar ien onmacht ien et bad lag. Met zien beiden hemmen ze Gert Jan weer uut et bad kregen. De Nijschierege buurvrouw is geliek bij alle buren laangs west om et bad verhoal te vertellen.
Gert Jan het et zitbad verkocht aan zien neef Geert, die wol der n drinkbak van moaken veur zien kalver. Gert Jan het nooit weet ien n zitbad zeten.
Leneke Struiksma
Mientje: “Moest dij ok goed achter de oren wassen”
