IPP: De LauwersTocht
Dizze winter hemmen we met e kerst n poar doagen vorst en nou leit er n proeksel snij had. Der is nog gien zicht op strenge vorst en t Zijldiep kabbelt rusteg deur ons dörp. Wel scheuveln wil, moet noar Hearenfean of Kardinge en as t eefkes vrust noar de nije iesboan van Tolbert. Scheuveln op natuuries is al weer n pooske leden. Ien e eerste Corona-winter konden we et Zijldiep op, al leefden we toen nog ien e anderhalve meter-wereld. Doarom wol ik et mor es hemmen over de Lauwerstocht een toer- en wedstriedtocht over de grensrivier ‘De Lauwers’. Doarveur moeten we al meer dan 10 joar weerom ien e tied.
Vanzelf werd er bij dikke vorst altied al wel scheuveld op e Lauwers, mor n echte tocht met medailles veur de deurzetters, dat was wat nijs. De ‘Iesvereniging Visvliet/Pieterziel’, ze bestonden ien 2025 al 150 joar, organiseerde ien 1964 veur t eerst een toertocht.
De ienschrieving en start was ien e olle schoel van Visvliet. Vandoar et ies van de Lauwers op en dan over t Zijldiep deur et dörp Pieterziel. Dan linksof de Olle Lauwers op en langs Burum weerom noar Visvliet. De eerste keren mosten de rieders 10 keer dat rondje moaken en kwammen ze ien totoal op 60 kilometer uut. Loater werd et traject veranderd. De start bleef ien Visvliet, mor de reis ging eerst van Pieterziel, Muntjeziel en Lauwerziel noar Zoltkamp, doar stempeln en dan weerom noar Visvliet. Eenmoal weerom kon je nog n slag noar Gerkesklooster en weerom moaken. Veur de toerrieders was t ok mogelek om körtere òfstanden te rieden en dat moakte de tocht zeker populair bij jong en old. Der is immers niks mooiers dan bij winterweer deur de witte wereld te roetsjen.
Van die eerste tocht ien 1963 is niet bekend hoeveul deelnimmers der precies wadden. Op 19 jannewoarie 1980 wadden er 1400 toerrieders en 61 wedstriedrieders. Juust ien die tied was et marathonrieden ien e belangstelling en as de rieders de kans kregen op n natuurieswedstried, dan deden ze groag met. Lubbert van de Molen uut Nuus, een bekende rieder, won de wedstried. Ien e tachteger joaren werd de wedstried mor liefst vief keer verreden en op 19 jannewoarie1985 deden mor liefst 2500 toerrieders met. Dat joar was de iesclub der op tied bij, want de Elfstedentocht, toen wonnen deur Evert van Benthem, werd pas n moand loater verreden. De joaren doarnoa werd de tocht minder voak reden. Ien 1997, toen Henk Angenent, de spruutjeskoning, de Elstedentocht won, konden ze t ies ok weer op.
Ien 2009 leek et er met strenge vorst op, dat er eindelek weer n Lauwerstocht verreden worden kon. Et ies lag dik ien e rivier en e iesboan was al doagenlang flink bezet west.
t Bestuur was drifteg op zoek goan om alle beneudegde attributen, denk aan wegwiezers, bankjes, koek&zopietent en stempels. Et mos er nou toch echt weer es van kommen.
Totdat ..... Wetterskip Fryslân zunder te woarschouwen de sluus bij Zoltkamp open zette. Der kwam n flinke stroming op gang en onder de brug van Pieterziel ontston n groot wak. De tocht kon niet deur goan. t Wetterskip beweerde dat ze et overtollege wotter kwiet mosten en dat ze vergeten hadden om de iesclub te ienformeren. Een poar doagen loater was van scheuveln al gien sproake meer, omdat et flink dooide,
Ien 2012 kwam de herkansing. Op 10 feberwoarie deden 2000 rieders met aan e tocht, woarbij et biezunder was dat er 750 deelnimmers jonger dan 18 joar wadden. De organisoatie had ien eerste ienstantie mor 1000 medailles moakt, dus de opkomst was ver boven verwachting. t Was die dag prachteg mooi weer (Foto: Popke Wilpstra, Visvliet), et ies was goed en der wadden mor n poar ongelukjes. Dat is nou dan al weer 14 joar leden!
De Lauwers beleven vanòf et ies is n biezundere ervoaring, mor op dit moment zit dat er nog niet ien. Dan van t zummer mor n keer met de boot van t VisserijMuseum metvoaren. Dat is ok mooi en veul minder kold.
Geert Zijlstra
Mientje: “Hij ridt n scheve scheuvel!“
