RECLOAME
Men ontkomt er niet aan: geregeld recloame kieken veur de t.v. Zo zag ik n recloame veur Blue Band. Doar zit n man te speulen op n cello. Veur hem stijt n “koebeest”. Ze het allèn mor tanden en koezen ien e onnerkoak. Ze eet gras, dus vegetarisch en doar wordt o.a. room bodder van mokt. Nou niet uut dizze koe. Dit is n illegale koe. Woar zie ik dat aan? Zij het gien oormerken ien. Is verplicht. Al knikt ze met de kop. Zo n oormerk kriegen ze drekt as ze geboren worden. Moeten ze registreerd worden. Dizze “koe” het dat niet. Doar ken de eigenoar een dikke boete veur kriegen. Degene die dizze recloame mokt het, har doar beter om denken moeten! Mor zoas ik al zee ist gien koe. Dizze koe het nog gien kalfke had, dus ken er gien melk geven. En doar gijt het hier om. Gien melk gien bodder. Aal mokt er recklomae veur “Roombotter” Dizze koe is n hokkeling of pink zo jem willen. Ist zulfde.
Kiek as n koe n kalfke krigt gijt ze melk geven, want t kalfke moet drinken hemmen. De “biest” het eerste wat n koe geft noa de bevalling, krigt het kalfke wel, veurzover ik wiet. Aal wordt hem, heur, dat met de titfles geven. Mor doar zal ik nog es noar vernemen. Er is hiel wat te ontdekken. Dit is vanzulf veur degene die het juuste nog niet wiet van n koe en heur kalfke. As t kalfke er n dag is wordt de koe molken. Dat moet en dat vient ze lekker. Want heur joar of “uier” net hoe je t noemen willen, stijt anners op springen. Het gebeurt wel dat er zomor melk uut loopt. Dan is t joar overvol. Logisch toch.
En dan begunt het. Elke dag ja twee keer op n dag wordt ze molken. Vroeger ging dat met de hand. Zatten ze gezellig tegen de koe aan te melken. Het schuumde ien e emmer en dan kwam t ien de melkbus via een teems. Want er kon nog wel es smirrigheid ien zitten. De koe sloeg wel es met de steert de melker om e oren. Of dee een stap uutziet. Was ok niet plezierig. Elke koe was niet makklijk. Summigen hadden een hekel aan om met de hand te worden molken. Mor ja men dee ien die tied niet anners. As de melk ien de melkbus was, van elke koe gewoon deurmekoar, dat is trouwens nog zo, allèn komt het nou in n grode tank en die wordt denk ik mor één keer ien e week leegt. Mor dat hangt er van of hoeveul koeien een boer het. Dus ken t morzo weden, dat er elke dag een grode tankwoagen komt om de melk op te hoalen en noar de febriek te brengen. Vroeger werden de volle bussen ophoalt met de melkwoagen. Eerst met peerd en woagen, loater met n tractor. Die ging elke dag, behalve zundags, bij de boeren laangs, en s oavends kregen ze de lege bussen trug.
Wat mij ok opviel, ik zie gien koe met horens meer. Ja ien t wild nog wel en messchien bij n biologische boer, mor verder gien één. Worden die horens bij de geboorte verwijderd of zo. Liekt mij een pienlijke aangelegenheid. Ik heb er noar vernommen en er worden nou stieren fokt die kalfkes zunner hoorns geboren loaten. Dat dàt ken. Het is om te veurkommen dat ze mekoar verwonden. Want ze vechten wel es. Het bennen net minsen. As ze ien t veurjoar weer ien t land kommen springen ze een gat ien e lucht, zo bliede bennen ze dan. Ken ik mij veurstellen. De hiele winter ien e stal stoan, sums vastbonden, kennen ze amper een stap uutziet doen. Wat is doar nou aan. Tegenswoordig hemmen ze loopstallen. Mor ja, doar bennen ze niet allèn. Lopen ze mekoar ok ien e weg. Mor ze wieten krekt wanneer het melkerstied is. Dan lopen ze alvast noar de melkerij. Want een ollerwetse melkmechine komt er niet meer aan te pas. Ze kriegen nou zo n zoegnap aan de tepels en die zoegen de melk uut t joar, Zol dat n lekker gevoel weden?
Sums denk ik dat elk en één wel wiet hoe t met de koeien gijt, t melken en zo. Mor dat schient niet altied zo te weden. Vandoar dizze uutleg. En as jem t allemoal wel wizzen, sloag de lezerij dan mor es een keer over. Is echt niet slim. Volgende keer beder. Nog even wat over vroeger, hadden we n hakhoorn, hiet nou n schoenlepel, mor was de helft van n koehoorn.
MARTJE
